वॉशिंग्टन : अमेरिकेचे माजी राष्ट्राध्यक्ष आणि रिपब्लिकन उमेदवार डोनाल्ड ट्रम्प यांनी भारतावरील आयात शुल्कात मोठी वाढ करत २५% अतिरिक्त कर लादण्याची घोषणा केली आहे. यासंबंधीच्या कार्यकारी आदेशावर गुरुवारी स्वाक्षरी करण्यात आली असून, हा निर्णय २७ ऑगस्ट २०२५ पासून लागू होणार आहे. याआधी ३० जुलै रोजी त्यांनी भारतावर २५% कर लावण्याची घोषणा केली होती. आता एकूण शुल्काचा दर ५०% वर जाणार आहे.
या निर्णयामागचे कारण म्हणून ट्रम्प यांनी भारताकडून रशियाकडून तेल खरेदी होत असल्याचे नमूद केले आहे. त्यांनी स्पष्टपणे म्हटले आहे की, भारत रशियाकडून प्रत्यक्ष वा अप्रत्यक्षपणे तेल आयात करत आहे. त्यामुळे युक्रेन युद्धात रशियाला आर्थिक मदत पोहोचते. या पार्श्वभूमीवर भारतावरील आयात मालावर अतिरिक्त शुल्क लादण्यात येणार आहे.
ट्रम्प यांच्या आदेशानुसार, २१ दिवसांच्या आत हे शुल्क लागू होणार आहे. तथापि, ज्या मालाची जहाजांवर लोडिंग आधीच झाली आहे, किंवा जो निर्धारित तारखेपूर्वी अमेरिकेत पोहोचणार आहे, अशा काही मालांवर सूटीची तरतूद देखील आहे.
याआधी, मार्च २०२२ मध्ये अमेरिका प्रशासनाने रशियन तेल आणि संबंधित उत्पादनांच्या आयातीवर पूर्ण बंदी घातली होती. परंतु आता ट्रम्प यांना आढळून आले आहे की भारत अजूनही रशियाकडून तेल खरेदी करत आहे. त्यामुळे भारतावर आर्थिक दबाव टाकण्यासाठी हा टोकाचा निर्णय घेण्यात आला आहे.
या निर्णयामुळे भारत-अमेरिका व्यापार संबंधांवर परिणाम होण्याची शक्यता असून, व्यापार तज्ज्ञ आणि धोरणकर्ते याकडे गांभीर्याने पाहत आहेत.
Join Our WhatsApp Channel