विश्रामबाग परिसरात उद्या अपुरा पाणीपुरवठा, नागरिकांनी पाण्याचा वापर काटकसरीने करण्याचे आवाहन

सांगली : हिराबाग प्युअर वॉटर पंप हाऊसमधील ७५ एचपी क्षमतेच्या व्हीटी पंपच्या डिस्चार्ज हेडमध्ये क्रॅक आल्याने आणि त्यामधून गळती होऊ लागल्याने सदरचा पंप तातडीने बंद करण्यात आला आहे. त्याऐवजी सध्या स्टँडबाय असलेला ७० एचपी क्षमतेचा पंप वापरून पाणीपुरवठा सुरू करण्यात आला आहे. मात्र या पंपाचा डिस्चार्ज तुलनेत कमी असल्याने विश्रामबाग परिसरातील काही भागात २ ऑगस्ट २०२५ रोजी अपुरा व कमी दाबाने पाणीपुरवठा होणार आहे, अशी माहिती कार्यकारी अभियंता चिदानंद कुरणे यांनी दिली.

पाणीपुरवठा प्रभावित होणाऱ्या भागांमध्ये चांदणी चौक ते गणपती मंदिर, दत्तनगर धामणी रोड, विश्रामबाग मुलींच्या वसतिगृहाजवळील गणपती मंदिर परिसर, शंभर फुटी रोड, प्रगती कॉलनी, शांतीबन कॉलनी, नागराज कॉलनी आदी भागांचा समावेश आहे. या भागांना जल भवन व विश्रामबाग येथील टाक्यांवरून पाणीपुरवठा केला जातो. परंतु पंपाचा क्षमतेत फरक असल्याने टाक्यांमधून पुरेसा दाब मिळणार नाही.

या परिस्थितीत नागरिकांनी उपलब्ध पिण्याच्या पाण्याचा वापर अत्यंत काटकसरीने करावा आणि सहकार्य करावे, असे आवाहन विशेष कार्य अधिकारी सुनील पाटील यांनी केले आहे.