कोल्हापूर : अनंत चतुर्दशीच्या दिवशी होणाऱ्या सार्वजनिक गणपती विसर्जनासाठी कोल्हापूर महापालिकेची संपूर्ण यंत्रणा सज्ज झाली आहे. विसर्जन मार्गावरील धोकादायक इमारतीभोवती बॅरिकेट्स व सूचना फलक लावण्यात येणार असून नागरिकांनी या इमारतींमध्ये प्रवेश न करण्याचे आवाहन महापालिकेकडून करण्यात आले आहे.
पावसाने विश्रांती दिल्याने विसर्जन मार्गावरील खड्ड्यांवर युद्धपातळीवर डांबरी पॅचवर्क सुरू आहे. इराणी खण व विसर्जन मार्गावर सीसीटीव्ही, बॅरिकेट्स, वॉच टॉवर आणि प्रकाशयोजना करण्यात आली आहे. मिरवणूक मार्गावरील झाडांच्या फांद्या छाटणे, अडथळे व अतिक्रमणे दूर करण्याचे कामही सुरू आहे.
सार्वजनिक गणेशमूर्तींच्या विसर्जनासाठी इराणी खणावर चार क्रेन, दहा फ्लोटिंग तराफे, १०० टेंपो, ४१५ हमाल, ५ जेसीबी, ७ डंपर, ४ पाणी टँकर, २ बूम, ६ ॲम्बुलन्ससह विविध यंत्रणा सज्ज ठेवण्यात आल्या आहेत. पवडी, आरोग्य, उद्यान व इतर विभागांचे सुमारे ३ हजार कर्मचारी नियुक्त करण्यात आले आहेत. आरोग्य विभागाकडून साफसफाईसाठी आरोग्य कर्मचारी व वैद्यकीय पथके नेमली असून निर्माल्य व अर्पण सामग्रीसाठी स्वतंत्र वाहतूक व्यवस्था करण्यात आली आहे. नागरिकांच्या मदतीसाठी ०२३१-२५४५४७३, २५४२६०१ हे दूरध्वनी क्रमांक उपलब्ध करून देण्यात आले आहेत.
शनिवार, दि. ६ सप्टेंबर रोजी अनंत चतुर्दशी निमित्त विसर्जन मिरवणुकीत सहभागी होणाऱ्या सार्वजनिक संस्था, तरुण मंडळे व तालीम संस्थांच्या अध्यक्षांचे महापालिकेच्यावतीने स्वागत करण्यात येणार आहे. हॉकी स्टेडियम येथील पर्यायी विसर्जन मार्गावरही स्वागत कक्ष उभारण्यात आला असून या ठिकाणी श्रीफळ, पान, सुपारी व एक रोप देऊन मंडळांचा सन्मान केला जाणार आहे.
अग्निशमन विभागाकडून विसर्जन ठिकाणी अग्निशमन दलाचे पथक व सुरक्षा रक्षक तैनात करण्यात येणार असून पर्यावरणपूरक गणेशमूर्तींचे विसर्जन इराणी खणात करण्याचे आवाहन महापालिका प्रशासक के. मंजूलक्ष्मी यांनी केले आहे.
Join Our WhatsApp Channel