पूरग्रस्तांसाठी महापालिकेची आरोग्य सेवा सज्ज

कोल्हापूर : पंचगंगा नदीची पातळी धोक्याच्या पातळीकडे वाटचाल करत असल्याने कोल्हापूर महापालिकेकडून संभाव्य पूरस्थितीला सामोरे जाण्यासाठी व्यापक तयारी करण्यात आली आहे. शहरातील पूरग्रस्त नागरिकांना सुरक्षित स्थळी हलविण्यासाठी 30 निवारा केंद्रे उभारण्यात आली असून प्रशासक के. मंजूलक्ष्मी यांच्या सूचनेनुसार या ठिकाणी आरोग्य सेवांची सर्व सुविधा उपलब्ध करून देण्यात आली आहे.

या छावण्यांमध्ये आरोग्य तपासणीसाठी 2 सहाय्यक नियंत्रण अधिकारी व 37 वैद्यकीय अधिकारी नियुक्त करण्यात आले आहेत. आरोग्याधिकारी डॉ. प्रकाश पावरा हे नियंत्रण अधिकारी तर डॉ. अमोलकुमार माने नोडल ऑफिसर म्हणून काम पाहणार आहेत. आवश्यकतेनुसार सावित्रीबाई फुले रुग्णालयातील इंटर्न डॉक्टरांची मदत घेतली जाणार आहे. गरोदर माता, गंभीर रुग्ण आणि इतर नागरिकांना तातडीने उपचार मिळावेत यासाठी विशेष व्यवस्था करण्यात आली आहे.

भांडार विभागाकडून औषधसाठा तयार ठेवण्यात आला असून दिलेल्या आरोग्य सेवेचा दैनंदिन अहवाल सांख्यिकी अधिकारी संजय कुंभार यांच्याकडे सोपविण्यात आला आहे. या तयारीमुळे पूरग्रस्तांना योग्य वेळी आरोग्य सुविधा मिळून त्यांचे आरोग्य सुरक्षित राहण्यास मदत होणार आहे.